[center][center][font=Arial][font=Arial Narrow]بسم الله الرحمن الرحيم
الســر المخــفي !
الساعه السادسه في إحدى أحيـاء المنطقه الشرقيه في السعوديه ، وبالأخص في إحدى البيوت ..
في غرفة نوم صبـا .. رن هاتفهـا الجوال طويلاً فردت بصوتٍ نعسان بعد أن رأت من المتصل : حنانوه ووجع
حنان : ههه في ضرسك
صبا : مالت عليكِ
حنان : يله قومي خلصينـا لاتقولي اليوم غـياب ؟
صبا وهي تغطي وجهها ببطانيتها الدافئه : مممممم .. بردانه حنان حيل .. مقدر أقوم من سريري الدافي فديته والله .. خلاص أنا اليوم غايبه إذا وزعو أوراق أخذي لي
حنان : قـومي الحـين أحسن لك ... نسيتي إن هذا وقت هبالنا السنوي !
تذكرت صبا العـاده التي يقومون بممارستها سنوياً دون علمٍ من أهلهم : هااه هااه بقوم .. تقلعي الحين
حنان : مب قبل ماأسمع صوت المويه في الحمام
صبا : ياشينك .. قلت لك خلاص بقوم .. تقلعي
حنان بإصرار : بسرعه سمعـيني
قامت صبا بملل من سريرهـا وأتجهت إلى الحمام وفتحت صنبور المياه لكي تسمع حنان صوت الماء ..
صبا وهي ترتجف برداً : سمعـتي ؟ يله باي
حنان : هههههههههههه .. طيب يله لا تتأخري
صبا : زين
وتغلق صبا الخط في وجه صديقتها حنان
xXxXx
في المدرسه الثـانويه ، وأثناء الطابور الصباح
نوف وماريا مع بعض مصطفتان وخلفهن أماني
أمـاني وهي تنظر للمديره التي كانت تلقي كلمه على الطالبات : جعلك زكام يارب .. لك خلق تهذري من الصباح وفي هالبرد !
ماريا ترتجف : سدي حلقك مالي خلق يهزأونا من الصباح
نوف : زكـام بس ! قولي عساها صخونه عشان تغيب أسبوع ونرتاح
ماريا : بنات بنات شوفو إيلاف تو الحين جايه .. شوفو شعرها منكوش ماأمداها تستشوره
ماريا و نوف وأماني : ههههههههههههههههههههه
وإذا بصوت من خلفهن : أولى خامس !
نوف بهمس : يمه
ماريا بهمس : أبوي
أمـاني : أسكتن مالت عليكن
أتت المراقبه ووقف قربهن وسكتن ..
المراقبه وهي تنظر إلى نوف التي كانت تلبس الكثير من الثياب ليقيها من البرد وبألوان فاقعه ومخالفه لقوانين المدرسه : وش ذا إلي لابسته يانوف ؟
نوف كـانت بطبعها جريئه : يعني بني آدم وش يلبس غير الثياب !
ماريا لم تقدر أن تكتم ضحكتها : هههههههههههه
المراقبه : صدق إنكن قليلات حياء .. أطلعن قدامي بسرعه
أمـاني هي المحامي الرسمي لصديقاتها : أبله لو سمحتي بما أنني المحامية الرسميه للشله .. أنتي عارفه نوف ماتقدر على البرد عشان كذا تلبس ملابس كثير
المراقبه : أسكتي أنتي محد كلمك
أماني : عارفه ياأبله محد كلمني بس أنا المحاميه الرسميه للشله
المراقبه بعصبيه : بسرعه أنتين الثلاث قدامي
نوف : رحنـا فيها
ماريا : ههههههههههه
المراقبه : ضحكتي من سرك بلاء .. بسرعه قدامي يله
خرجت الطالبات الثلاث نوف و ماريا و أماني من الطابور الصباحي ، ووقفو قرب الإداره إلى أن ينتهي الطابور ومن ثم تأتي الإداره ليروا في أمرهن
دخلت إيلاف طابور فصلها وهي تنظر إلى صديقاتها الثلاث الاتي وقفن عند غُرف الإداره
أحلام ألتفتت إلى إيلاف وقالت : وش بلاهن خوياتنا ؟
إيلاف : مدري .. أبله عايشه الزفته أخذتهن
حنان التي كانت صافه مع أحلام : طيب سدن حلقكن أنتو الثنتين عشان ماياخذونا
أنتهى الطـابور ، وصعدت كل الطالبات إلى فصولهن
عدا أماني و نوف و ماريا الاتي كن واقفات عن الإداره
أتت المديـره لتدخل غرفتـها ولاحظت أماني و نوف وماريا واقفات جهة الإداره .. جائت المديره لهن وقالـت بلطف : وش فيكن بنات ؟ وش عندكن من الصبح ؟ مب شايفين الجو بارد ! خلاص روحن على فصولكن
نوف : أبله عايشه تبينا
المديره : ليه ؟
نوف رسمت على وجهها البرائه : تبيني أخلع ملابسي لأن ألوانها فاقعه حيل
المديره : يعني عارفه إنك لابسه شي ممنوع
نوف تمثل دور الطالبه المظلومه : طيب أبله أش أسوي ؟ أنا وحده ماأتحمل البرد .. تجيني حالات تشنج وإغمـاء في البرد وأنتو كل يوم تسوو طابور .. أش أسوي يعني ؟ أجلس في البيت طول فترة الشتاء !
ماريا تُكمل تمثيلية صديقتها : هي صـادقه ياأبله .. حنا مانتحمل نوقف في البرد
المديره : طيب إذا ماتقدرن أجلسن في الفصل
أماني هي الأخرى تكمل ماأبتدئته صديقتيها : طالبات النظام ينزلونا غصباً عنا
صدقت المديره ماقالته الطالبات : طيب أنا راح أعطيكن أذن مني يخليكن تجلسن في الفصل
فرحت ماريا لأنها تكره الوقوف في طابور الصباح : صدق والله ياأبله ! مشكوره مشكوره حــيل
وأخذن الطالبات الأذن وصعدن إلى فصلهن من السلم الخلفي لكي لا تراهن المراقبه التي نسيت موضوعهن تماماً ^_^
أماني : أنا أسحب دعوتي ماأبي يصيبها زكام خلاص
نوف : وأنا كمان ماأبي تصيبها صخونه
ماريا : آمين يارب العالـمين .. كذا المديرات ولا بلاش
في هذه اللحظه وصلن إلى فصلهن ، أولى خامس .. طرقت أماني الباب ودخلت هي الأولى و نوف و ماريا خلفهـا ^_^
xXxXx
خرجت صبا من منزلهم القريب من المدرسه ، وذهبت الى المدرسه مشياً .. عندنا وصلت للمدرسه رئاها حارس المدرسه فقال : مره ثـانيه لاعـاد تتأخري
صبا بملل : يصــير خير
دخلت المدرسه ووقفت عن برادي المياه الموجود قرب الباب .. خلعت عباتها وحجابها وبسرعه لبست معطفها البنفسجي وشالها الأبيض الصوفي ونظرت إلى نفسها في البراد لأن البراد يعكس صورتها .. أخرجت علبة المكياج الصغيره التي تحملها دائماً معها في حقيبة المدرسه وقالت بهدوء : ماأمداني أكشخ في البيت أمي تصارخ علي عشان ماأتأخر خلني أتمكيج هنا .. عسى ماتجي لي أبله وتصادر مكياجي ويكتبوني تعهد ... عاد هالمره ملفي راح ينفجر من التعهدات
رسمت عينها من داخل بالكحل الأسود ثم وضعت تحت عينها كحل تركواز .. ثم وضعت أحمر شفاه وردي لامع على شفتيها الجميلتين ..
وقفت وأخذت أغراضها ومشت في الفناء الخارجي للمدرسه وكان صغيراً جداً .. ودخلت إلى المدرسه لم ترى أحداً !
أتجهت بسرعه إلى غرفة المستخدمات التي كانت قرب الباب لكي تعدل شعرها لأنها لم تستطع أن ترتبه في الخارج لشدة برودة الجو لأنه فصل الشتاء
خرجت من الغرفه وصعدت السلم الذي كان قرب الغرفه بسرعه وهناك أيضاً سلم آخر في الزاويه الخلفيه للمدرسه
مهم جداً أحبتي أن تعلمو كيف هو تفصيل المدرسه
أولاً فناء خارجي صغير يوجد به برادان للمياه قرب الباب الخارجي
والباب الآخر هو الذي يُدخل إلى داخل المدرسه .. على يمين الباب مباشره غرفة المستخدمات وعلى يمين غرفة المستخدمات السلم الأول أي السلم في زاويه .. و الزاويه المقابله لها يوجد السلم الآخر
وفي الوسط يوجد الفناء الكبير للمدرسه .. وهو على شكل مستطيل .. ولا يوجد بالطابق الأول فصول دراسه .. يوجد غرف الإداره وحمامين " أعزكم الله " حمام كبير أمام المقصف وحمام صغير في زاويه آخر .. وغرفة تدبير ، و مختبران ، وغرفة إجتماعات ، ومكتبه والطابقين الآخرين يوجد الفصول وغرف المعلمـات
وكل فصل يطل على سور حديد ، وهذا السور يطل على فناء المدرسه الكـبير
أتمنـى أنكم فهمتم كيف
والآن نرجع إلى صبـا ^_^
صعدت صبا الطابق الثاني حيث يوجد فصلها وأتجهت إلى فصلها
أولى سـابع .. طرقت الباب بهدوء وفتحت الباب ودخلت مبتسمه وقالت : السـلام عليكم
معلمة الرياضات : وعليكم السلام .. ليه متأخره ياصـبا ؟
صبا وهي تغلق الباب خلفها : أبله السواق تأخر علي